महर्षि महेश योगीको १०२औँ जन्मजयन्ती

काठमाडौँ,३ पुस । वैदिक ज्ञानको विश्वव्यापी प्रचारप्रसारमा योगदान गर्नुभएका महर्षि महेश योगीको १०२औँ जन्मजयन्ती मनाइएको छ । आज राजधानीमा विविध कार्यक्रमको आयोजना गरी महर्षि महेश योगीको जन्मजयन्ती मनाइएको हो ।

नेपाल महर्षि वैदिक फाउण्डेशनले आयोजना गरेको कार्यक्रममा फाउण्डेशनका अध्यक्ष एवं पूर्व गृहराज्यमन्त्री दीपकप्रकाश बाँस्कोटाले विश्व शान्तिका लागि नेपालले नेतृत्व गर्नसक्ने महेश योगीको वाणीलाई पूरा गर्ने अभियानमा लाग्न आह्वान गर्नुभयो ।

विसं २०३१ मा टुँडिखेलमा आयोजना भएको प्रवचन कार्यक्रममा महर्षि महेश योगीले हिमालयको काखमा रहेको नेपालले वैदिक ज्ञानका माध्यमबाट विश्व शान्तिका लागि नेतृत्वदायी भूमिका निर्वाह गर्नसक्ने बताउनुभएको थियो ।

कार्यक्रमममा भावातीत ध्यान शिक्षक मीनराज अधिकारीले हाल नेपालमा भइरहेको वैदिक अभियानका बारेमा जानकारी गराउनुभयो । यसैअवसरमा नेपाल ग्लोबल मदर डिभाइन अर्गनाइजेसनले आयोजना गरेको कार्यक्रममा सामूहिक गुरूपूजन, भावातीत ध्यान, महर्षि महेश योगीको जीवनी र योगदानका बारेमा चर्चा भएको थियो ।

संस्थाका अध्यक्ष कल्पना घिमिरेले प्रत्येक शनिबार बिहान ८ बजे ध्यान परीक्षण आयोजना गरिने भएकाले सहभागी हुन आह्वान गर्नुभयो । कार्यक्रममा ध्यान शिक्षिका एवं संस्थाका सदस्यहरू पप्पीदेवी रेग्मी, विमला शर्मा, लक्ष्मी पाण्डे, सरस्वती विष्ट, कल्पना गिरी, शकुन्तला पोख्ररेल, कल्पना अधिकारी, पयश्वनी घिमिरेलगायतले शान्ति एवं आनन्द प्राप्तिका लागि महर्षिले बाँड्नुभएको भावातीत ध्यानको ज्ञान उपयोगी हुनेमा जोड दिनुभएको थियो ।

हाल विश्वका १९२ देशमा भावातीत ध्यान साधना हुने गरेको छ । ध्यानका माध्यमबाट मानसिक क्षमताको विकास, राम्रो स्वास्थ्य, अरुसँगको व्यवहारमा सुधार र विश्व शान्तिका लागि सहयोग पुग्ने वैज्ञानिक अनुसन्धानबाट प्रमाणित भएको जनाइएको छ । बिहान, बेलुका २०/२० मिनेट ध्यान गर्ने साधकले तनावबाट मुक्ति पाई आनन्द अनुभूति गर्ने, स्मरण शक्ति बढ्नेलगायत फाइदा हुने अनुभव नियमित साधना गर्ने साधकले गर्न सक्ने सो अवसरमा जानकारी गराइएको थियो ।

LEAVE A REPLY

Please enter your comment!
Please enter your name here