विभिन्न आर्थिक क्षेत्र नेपालमा प्रगति र समृद्धिको इञ्जिनःमन्त्री गोकुलप्रसाद बाँस्कोटा

काभ्रेपलाञ्चोक, १४ माघ । सञ्चार तथा सूचना प्रविधिमन्त्री गोकुलप्रसाद बाँस्कोटाले विभिन्न आर्थिक क्षेत्र नेपालमा प्रगति र समृद्धिको इञ्जिन भएको बताउनुभएको छ ।

पनौतिस्थित सामुदायिक बचत तथा ऋण सहकारी संस्थाको रजत महोत्सवमा आज मन्त्री बाँस्कोटाले भन्नुभयो, “कृषि, पर्यटन, यायायात, सञ्चार, जलविद्युत्लगायत आठ क्षेत्रमा प्रगति गर्न नेपालको आर्थिक क्षेत्र समृद्धिको इञ्जिन हो, आर्थिक क्षेत्रलाई मुख्य इञ्जिनका रूपमा अघि सारेका छौँ ।” नेपालमा अर्थतन्त्र मजबुत नहुँदासम्म केही वैदेशिक ऋण लिनुपर्ने बाध्यता रहेको उहाँले बताउनुभयो ।

मन्त्री बाँस्कोटाले अब राजनीतिक आन्दोलन सकिएकाले आर्थिक प्रगति, समृद्धि र क्रान्ति तथा पुनःनिर्माण र समाजका प्रत्येक क्षेत्रको समृद्धिमा नेपाल प्रवेश गरेको बताउनुभयो । उहाँले भन्नुभयो, “यसमा सरकार मात्र सामेल भएर पुग्दैन, आर्थिक, शैक्षिक, सांस्कृतिक र सहकारीको क्षेत्रले हातेमालो गरेपछि मात्रै मुलुकले चाहेको प्रगति हासिल गर्नसक्छ ।”

मन्त्री बाँस्कोटाले सरकार तीव्र आर्थिक वृद्धिदर कायम गर्ने अभियानमा रहेको उल्लेख गर्दै भन्नुभयो, “पछिल्लो प्रतिवेदनले करीब छ प्रतिशतले राष्ट्रिय वृद्धिदर कायम भएको देखाएको छ, बाहिर हल्ला भएझैँ भएको भए यो प्रगति कसरी सम्भव भयो ?” उहाँले सरकारले कुनै एक क्षेत्रको एउटा विकासको मात्रै कल्पना नगर्ने बताउनुभयो ।

मन्त्री बाँस्कोटाले यसवर्ष पर्यटनको अपेक्षित लाभ हासिल गरिरहेको बताउनुभयो । उहाँले भन्नुभयो, “यो वर्ष १२ लाख बढी पर्यटक आइसकेको छन्, हामी सकारात्मक परिवर्तनको दिशातर्फ केन्द्रीकृत छौँ, आम नागरिकको साथ बिना सरकार सफल हुनसक्दैन ।”

LEAVE A REPLY

Please enter your comment!
Please enter your name here