पत्रकार महासंघको नयाँ नेतृत्वकालागि आज मतदान हुने, मतदानको समय बिहान ९ देखि ३ बजेलाई तय

काठमाडौं,५ भदौं– नेपाल पत्रकार महासङ्घको नयाँ नेतृत्वका लागि आज मतदान हुने भएको छ । व्यावसायिक पत्रकारिताको आधार प्रेस स्वतन्त्रता र श्रम अधिकारको नारासहित हिजो काठमाडौँमा सुरु भएको २५ औँ अधिवेशनले ४७ सदस्यीय नयाँ कार्यसमितिको चयन गर्नेछ । मतदानको समय भने बिहान ९ बजेदेखि दिउँसो ३ बजेसम्मलाई तोकिएको छ ।
४७ पदका लागि १२१ जनाको उम्मेदवारी परेको केन्द्रीय निर्वाचन समितिले जनाएको छ । तीमध्ये तीन जनाले फिर्ता लिएको र एक जनाको मापदण्ड नपुगेकाले ११७ जना कायम भएको प्रमुख निर्वाचन आयुक्त चिरञ्जीवी खनालले बताउनुभयो ।
अध्यक्ष पदका लागि गोविन्द आचार्य, तीर्थ कोइराला, इन्द्रबहादुर राउत, उजिर मगर र भावना विद्रोहीको उम्मेदवारी परेको छ । त्यस्तै उपाध्यक्ष खुलाको एक पदका लागि विपुल पोख्रेल, मात्रिका पौडेल र दीपक पाठकले उम्मेदवारी दर्ता गराउनुभएको छ ।

त्यस्तै महासचिव एक पदका लागि रमेश विष्ट र बालकृष्ण बस्नेतबीच प्रतिस्पर्धा हुने भएको छ । महिला सचिवका लागि लक्ष्मी पुन र सुष्मा पौडेलले उम्मेदवारी दिनुभएको छ । उपाध्यक्ष समावेशी एक पदका लागि दिलीप थापामगर र महेश दासको उम्मेदवारी परेको छ,भने कोषाध्यक्ष पदका लागि खगेन्द्र पन्त र राजेश मिश्रको उम्मेदवारी परेको छ ।
महासङ्घ विधानअनुसार समावेशी उपाध्यक्ष एक, महासचिव एक र छजना सचिव रहने व्यवस्था छ । छ सचिव पदमा महिला, आदिवासी, जनजाति, मधेसी, दलित एसोसिएट गेरर समावेशी बनाइएको छ । त्यस्तै कोषाध्यक्ष एकसहित ११ पदाधिकारी रहने व्यवस्था महासङ्घ विधानमा छ ।
महासङ्घले भौगोलिक र गैरभौगोलिक गरी प्रत्येक प्रदेशबाट दुई–दुई गरी २० जना, खुलातर्फबाट पाँच जना, महिलामध्येबाट तीन जना, दलितमध्येबाट दुई जना, आदिवासी जनजातिमध्येबाट दुई जना, मधेसी मध्येबाट दुई जना, अपाङ्गता भएका व्यक्तिबाट एक जना, अल्पसङ्ख्यकबाट एक गरी ३६ जना चयन गर्ने व्यवस्था विधानमा छ ।

LEAVE A REPLY

Please enter your comment!
Please enter your name here