डोल्पालीका लागि अस्पताल बन्दै तातोपानी कुवा

डोल्पा, २२ चैत-बिरामी पर्दा डोल्पाका अस्पतालमा सामान्य सिटामोलसम्म नपाउनु यहाँका जनताको नियति नै बनिसकेको छ ।

दुर्गम जिल्ला डोल्पाका सर्वसाधारणले वर्षौंदेखि स्वास्थ्योपचारका लागि विभिन्न प्रकारका समस्या भोग्दै आएका छन् । तर पछिल्लो समयमा डोल्पाली जनताको उपचार गर्ने अस्पतालका रुपमा बाफिलो तातोपानीका कुवा प्रयोग हुन थालेका छन् । यस्ता कुवामा जमिनको भित्री भागबाट नै तातो बाफयुक्त पानी आउने गर्दछ ।

प्राकृतिक रुपमा आफँै बनेका यी कुवा लामो समयदेखि डोल्पालीका लागि अस्पताल बन्दै आएका छन् । यी कुवामा डुबुल्की मारेर नुहाउनाले विभिन्न प्रकारका रोग निको हुने विश्वास रहेको छ ।
त्रिपुरासुन्दरी नगरपालिका—१ की स्थानीय धनकली सार्कीका अनुसार विगत चार वर्षसम्म शरीर दुख्ने रोगले हैरान पारेको थियो, पटकपटक जाँच गराउँदासमेत निको भएको थिएन, पछि गाउँका महिलाले तातोपानी कुवामा पुगेर नुहाएपछि निको हुन्छ भनेर बताए, उनीहरुले भनेअनुसार तातोपानी कुवामा नुहाएपछि शरीर दुख्ने रोग हराएको सार्कीले बताउनुभयो ।

“अहिले शरीर स्वच्छ छ, हरेक वर्ष यही समयमा तातोपानी पुग्छु, तीन दिनको बसाइमा सात पटकसम्म नुहाउने गरेपछि निको भएको छ”, सार्कीले भन्नुभयो, “हामी गरिब समुदायका लागि यस्ता कुवा अस्पताल नै साबित भएका छन् ।” प्रत्येक वर्ष यस्ता तातोपानीका कुवामा नुहाउनाले छाला, मुटुजन्य, बाथ, औलो, ज्वरो, मोटोपनलगायत विभिन्न प्रकारका दीर्घ रोगसमेत निको हुने डोल्पाली सर्वसाधारणको विश्वास रहेको छ ।

LEAVE A REPLY

Please enter your comment!
Please enter your name here